بنسافر سوا

بنسافر رحلات مدتها يوم في الأجازة الأسبوعية للورش بتاعتنا للأطفال المنضمين للمشروع . وهو ف يوم الحد مع أطفالنا العاملين (فئة أ) وف يوم الجمعة مع أطفالنا (الفئة ب) إخوة العاملين أو بيجمعوا بين التعليم والعمل. ومعظم الرحلات بيبقى فيها الترفيه والتدريب والتعليم. ولما الرحلة بتكون ف الصيف بتبقى عادة على البحر، لكن فى الشتاء بنروح أماكن تعلمنا حاجات كتير. ومن الرحلات إللى رحناها وكانت تعليمية: قلعة محمد على - متحف سوزان مبارك للطفل - قلعة صلاح الدين - حديقة الأزهر.

وف رمضان بنروح أمسيات ثقافية بعد الفطار زي بيت السحيمي والهراوي وقصر الأمير طاز. ومرة رسمنا ف حديقة الأزهر، مرة تانة شاركنا فى الأنشطة العملية للحفاظ على البيئة بمناسبة اليوم العالمى للبيئة، وف مرة تالثة شاركنا ف الاحتفال باليوم العالمي لمحافحة عمالةالأطفال مع غيرنا من جميعات ومنظمة العمل الدولية في مصر.

أما بالنسبة للمعسكرات فهى بتبقى معايشة كاملة لمدد بين ثلاث وأربع أيام.  معسكرات العاملين بتبقى في عيد الفطر والأضحى كل سنة، أما معسكرات الأطفال إللى ف المدرسة فتبقى ف الصيف.

في المعسكرات بنتعلم إزاي نعيش مع بعض ف جماعة، ونتحمل مسئولية نفسنا، سواء كنا بنات أو ولاد، فنبتدرب ع الحياة الكشفية والنظام ودخول المطبخ والمساعدة ف الطبيخ ونتولي مسئولية تنظيف أوضنا والمكان كله وغسل الملواعين.

بنتقسم لمجموعات ثابتة لها قائد من الأطفال ومساعد وقائد من فريق عمل الجمعية. وكل مجموعة بتعيش أيام المسعكر مع بعض ف أوضة، ويكون لها أدوار ومسئوليات متخطط لها طول مدة المعسكر. كمان كل مجموعة بتألف شعار وصيحة: ولازم يكونوا بيعبروا عن موضوع المسعكر وعن رأي المجموعة فيه. ولازم كل معسكر نطلعة يكون له أهداف نحققها سوا.

ف معسكر رفح اتعلمنا يعنى إيه الحدود بينا وبين الإسرائيلين. وكمان عرفنا عادات البدو وصناعاتهم فى معسكر الواحات ،وعرفنا أهمية وثروات البحر الأحمر وشعبه المرجانية فى معسكر نويبع ، وقد إيه شفنا عظمة جبل موسى وجمال المعظمة وعرفنا قيمة مكان زى دير سانت كاترين إللى فيه شواهد الأديان الثلاثة.

فى كل معسكر بنبقى مش عايزين نسيب بعض وإحنا مروحيين، ولما نرجع نتقابل بيقبى كل واحد مننا حس أنه بيرجع بشوف حد عزيز عليه. ودايماً لما نرجع الجمعية بعد المعسكرات، بنقيم المعسكر، ونحرص على سماع رأي كل طفل، وبنعمل أنشطة تعبر عن خبراتنا وإحساسنا بكل إللى شفناه  وعايشناه. 

شاركها بين اصدقائك :