المجموعة دى من أطفالنا بيجمعوا بين التعليم والعمل، منهم اللى بيشتغل فى الإجازات الصيفية، ومنهم اللى بيشتغل طول السنة مع الدراسة علشان يشارك مادياً مع عيلته أو يتحمل مصاريف دراسته ودروسه الخارجية، ومنهم إخوات الأطفال العاملين والجمعية بتساعدهم علشان ما يسيبوش دراستهم فبتقدم أنشطة صفية على مدار ثلاثة أيام بالأسبوع لدعم مهاراتهم وتنميتها ومحو أميتهم  ومساعدتهم على مذاكرة دروسهم المدرسية

وبنعمل معاهم أنشطة مختلفة (ترفيهية – فنية "موسيقى ومسرح ورسم ونحت وأشغال يدوية" – علمية وثقافية – دينية- تربوية ) وده بيكون يوم الجمعة من كل أسبوع. وكمان بنعمل رحلات مختلفة علمية وترفيهية وسياحية وتاريخية. ده غير المعسكر الصيفى اللى بيتم فى الإجازة الصيفية واللى بيكون من 3 إلى 4 أيام وبيكون عبارة عن مصيف ترفيهى – تربوى – تعليمى بنقدر من خلاله نعدل سلوكياتهم ونعلمهم سلوكيات ومهارات جديدة ونطور من تفكيرهم ونزود معلوماتهم وبيتدربوا فيه على التعايش مع بعضهم وإزاى يقوموا بقيادة مجموعة والمشاركة فيها.