كل الدراسات إللى اتكملت عن موضوع الإبداع أكدت إن الإبداع مهارة عقلية عليا، لكن عشان الطفلـ/ـة والمراهقـ/ـة يوصل لها، لابد من التدريب على مهارات تانية. فهل ممكن نتخيل إن الطفل والطفلة يبقوا مبدعين من غير ما يكون عندهم ثقة بنفسهم؟ ومن غير ما يكونوا قادرين على إنهم ياخدوا قرار – أي قرار – لوحدهم. والمقصود بالقرار هنا قرارات صغيرة زى تختار القميص ده ولا القميص ده؟ بتحب الكورة ولا السباحة أكثر. ومنها لما ألعب أختار أنهي طريقة للعب، أو اختار لون ف رسمة بالونها، أو اختار إني أقول أنهي كلام عن نفسي.

فالثقة بالنفس والقدرة على اتخاذ القرار، والقدرة على التعير عن النفس والشرح البسيط لأسباب اتخاذ القرار، هي مهارات أساسية لازم أي طفل يتدرب عليها عشان يمشي خطوات في الإبداع.

ورغم أن أغلب المبدعين متعلمين تعليم عالي، لكن ربنا إدا ناس بسيطة مش متعلمة قدرة إنها تكون مبدعة. زي مثلاً فكرة إن الستات إللي ما عندهمش  مصدر رزق ثابت قرروا ينظفوا الخضار ويبيعوه قصاد تجمعات الموظفين، وفيه بياعين قرروا يكتبوا جمل على عربيات عشان تجذب الزبون زى "تعا شرب شاي". فكتير من الحرف أصحابها مبدعين –رغم إنهم مش متعلمين – عشان عاوزين يتميزوا ف شغلهم.     

إحنا في الجمعية عندنا قناعة إن تدريب الطفل على مهارات الثقة بالنفس، واتخاذ القرار، والتخيل، والقدرة على التعبير عن النفس، هي السكة إللى تخلي الطفلـ/ـة لما يكبروا يبقي عندهم احتمال أكبر إنهم يكونوا مبدعين ف حياتهم الشخصية وف نطاق عملهم. والمهارة دي كل شوية بتبقى مهمة لأن السوق كله منافسة، فاللى قادر يجيب جديد حيعيش أحسن.

 وعشان كدا عندنا أنشطة كتير ومتنوعة بنصممها لهم من معارف ومجالات مختلفة مفيدة ومسلية، والفكرة ف "العجية" زى ما قلنا. كل علم من العلوم بيأكد على طريقة تفكير مهمة فالعلوم الطبيعية بتأكد على  الملاحظة والاستنتاج، والعلوم الإنسانية بتأكد على المنطق أو التحليل والتفكير النقدي. والفنون بتأكد على ترقية الحس والتعامل مع الجمال لفهمه، دا غير أن ممارستها بتدي ثقة بالنفس وقدرة على اتخاذ القرار في أي نشاط من أنشطته البصرية أو المسرحية.

إحنا بنعمل تخطيط شهري لأنشطة الفئات بتاعتنا العاملين بس فئة (أ) و إللى ف المدارس لكن محتاجين خدمتنا فئة (ب). وف التخطيط الشهري للنشاط بنراعي يكون عندنا لعب وتعليم نشط واستكشاف وأكل وتدريب، وتقديم عروض علمية أو مسرحية، دا غير الرحلات والمعسكرات. وكل دا بيدعم الثقة بالنفس، والتفكير، وممارسة الملاحظة والاستنتاج، والتخيل. وكلها خطوات لتعزيز مهارة الإبداع لمن يريد الاجتهاد منهم بعد كدا.