بنعمل إيه

جمعيتنا بتركز مشروعاتها على الأطفال المحرومين من خدمات التنمية وخصوصاً التعليم، فبنحاول نحمي الطفلة من غياب فرصة التعليم لأنها بنت وأهلها مش مقتنعين بتعليمها، وبنحاول نحمي البنت والولد من التسرب من التعليم بسبب إن المدارس سيئة ومش بتعلم أو إن مصروفات الدروس الخصوصية كتير، و الأهل على القد أو إن الأهل أرزقية فبيوجهوا الطفل للعمل مع التعليم أو بداله فيبقي طفل عامل ويتحرم من التعليم ومن أصحابه ومن اللعب والتنشئة في مناخ يراعي سنه. 

بنعمل مشروعات تنموية لعدد بين 80 و120 طفل وطفلة فبنقدم برامج منوعة من التعليم والفنون والألعاب دا غير الرحلات والمعسكرات، وكل مشروع مدته 3 سنين؛ عشان نأثر في الأطفال إللى بنضمهم في مشروعاتنا ونضمن بقاء الأثر التنموي اللي عززناه فيهم. 

بنقدم حصص محو أمية للطفل العامل طول الوقت، فبنوصله لمستوى يخليه يتابع التلعيم الإعدادي منازل، وبعدها ممكن يخش ثانوي عام منازل برضه أو ثانوي فني منازل أو انتظام. معظم الأطفال العاملين بتكمل في الثانوي الصناعي، والبنات العاملة أو إللي كانت بتجمع بين التعليم والعمل بتجاهد عشان تخش ثانوي تمريض أو صنابع. أما الأطفال المعرضين للتسرب من التعليم فبنقدم لهم حصص لدعم المهارات الموازية للتعليم الرسمي الحكومي (النظامي) وعندنا فصل استقبال بنضم فيه الطفل أو الطفلة الجداد عشان نقيس مستواه ونشوف انهي نوع من الدعم بنحتاجه. فلو كان الطفلـ/ـة أمي فبيدخل فصل محو أمية لكن لو كان مواكب لمستواه في المدرسة فبيدخل مع مجموعته في قاعات الدعم (وبنسميها فصول متعددة المستويات لدعم المهارات لأن كل قاعة بتضم أطفال من سنوات دراسية مختلفة - وفيه جمعيات تانية كانت بتسميها قاعات الاستذكار).

الفئة (أ) بتاعتنا إللى همة العاملين طول الوقت بنقدم لهم 3 حصص صباحية، قبل ما يروحوا ورشهم. والفئة (ب) إخواتهم والمعرضين للتسرب بنقدم لهم ثلاث مرات دعم تعليمي وفصول استذكار ثلاث مرات ف الأسبوع بعد المدرسة. وف كل مرة الطفلـ/ـة بيجوا الفصول بنقدم لهم بسكوت ولبن سادة أو بالشيكولاته أو بالشاي حسب رغبتهم. وأوقات بنقدم فاكهة معاها، عشان احنا عارفين إن التغذية السلمة بتساعد على التركيز والذاكرة.

غير دا: كل فئة من الفئتين الكبار بتوعنا لها يوم نشاط كامل، عشان الأطفال تتجمع مرة ف الأسبوع مع بعض. فبنمارس فيه أنشة فنية بصرية، وحقوقية، وألعاب المسرح التعبيري، والغنا، ونتعلم مهارة تقديم المعلومات، ومهارات تانية ف التفكير العلمي والناقد. فالفئة (أ) ميعادها كل أحد. والفئة (ب) ميعادها كل جمعة. وأوقات تانية بنقدم يوم الحد والجمعة ورش تدريبية للأطفال على الصحة والسلامة المهنية وعلى التغذية السليمة وعلى فهم التحرش والدفاع عن النفس. (ودي كلها أنشطة تنموية داخل المقر

ناس كتثير فاكرة أن مهارة التفكير العلمي والناقد ما بتيجيش غير بالتعليم النظامي للمناهج إللي بنتعلمها ف المدرسة، لكن فيه برامج متخصصة قدمها علماء التربية (علم النفس التعليمي) للتدريب عليها من غير حصص، عشان كدا إحنا بنطور المترجم منها ونقدمها ليهم ف أيام النشاط. وكمان بناخد أنشطة منوعة من المعارف الموجودة في مناهج التعليم الابتدائي والإعدادي بنقدمها ليهم زي التوازن البيئي، وأجهزة جسم الإنسان، والبوصلة، ومقياس الرسم، وتاريخ مصر وجغرافتها وقصص الأنبياء. فكلها معارف مهمة ليهم ف حياتهم بتنور عقولهم وبيستفيدوا منها بعد كدا.  

بنحرص ف معظم الأنشطة اللي نبقدمها على التعليم النشط ونفكر في هدف النشاط. ما بنقدمش برامج جاهزة لكن بنحاول ان احنا اللي نبتكر البرامج التنموية بتاعتانا ، علشان الفئات الخاصة لازم لها برامج خاصة، مش برامج "جاهزة". فبنحاول نطوع خبراتنا التعليمية مع الرسالة الثقافية للطبقات الشعبية.

بنحاول دايماً نمزج بين التعليم والنشاط الجاد والألعاب أو الأنشطة الترفيهية فمشروعنا يعتمد على استمرار جذب الأطفال للمكان. ودى معادلة مش سهلة. عشان كدا خبرتنا كلها في "العجنة" إللى بنعملها في أشطتنا ورحلاتنا وخلطنا ما بين اللعب والمعلومات الوظيفية للطفلـ/ـة.

 وف أيام النشاط الكامل كلها (جمعة وحد) بناكل مع بعض لأننا أسرة ولأننا بنجبهم واحد واحد وواحدة واحدة. والأطفال بتتقسم مجموعات لها قائد وقائد مساعد عشان نتعلم تدوير المسئولية. ولما بناكل مع بعض أوقات بنفهمهم قيمة الوجبة الغذائية المتكاملة ونحرص كلنا على غسيل الإيدين وقص الظوافر (الأطفال الميكانيكية اللي بتشتغل ف الجاز بيحصل لهم تليف كبدي بسبب الجاز تحت الضوافر وتخش ف أكلهم ومعدتهم).

إحنا كمان بنعمل رحلات ومعسكرات تجمع بين الترفيه والتعلم الذاتي وتأسيس ديناميات جماعة مساندة لبعضها البعض، وده له قسم خاص بنتكلم فيه عن الموضوع تحت بند "بنسافر سوا".

وأخيراً نتعاون مع الجهات الحكومية والغير الحكومية إللى بتشتغل على الطفلـ/ـة وتقدملم خدمات ثقافية وطبية مجانية أو بأسعار رمزية.

الكلمات المفتاحية:

الأطفال العاملين والمحرمين من التعليم - التعليم غير النظامي - دعم المهارات - فصول محو أمية - أنشطة دعم مهارات التعليم الأساسي - برامج جمعيات أهلية.  

شاركها بين اصدقائك :